Каля ўвахода ў галоўны корпус Акадэміі навук разгарнулася невялікая «будпляцоўка». Яе тэрыторыя абгароджана. Тут поўным ходам ідзе кладка каляровай карты нашай краіны прама на тратуарнай плітцы.
Як толькі карта будзе гатова, мы пакажам вам яе ва ўсёй красе.
Карта прыкладна памерам 20 на 20 метраў. Яна схавана ад вачэй жыхароў горада— засыпаная пяском. Такая тэхналогія кладкі. З зямлі тырчаць драты для яе будучага падсвечвання. Карта прадстане ва ўсёй красе перад жыхарамі і гасцямі Мінска да Дня Незалежнасці. Карэспандэнт «Р» даведаўся больш падрабязна аб аб'екце мастацтва ў кіраўніка апарата НАН акадэміка Пятра Віцязя:
— Праект нікога не пакіне абыякавым, асабліва турыстаў. Яркая карта, несумненна, прыцягне ўвагу, а ў цёмны час сутак кожная вобласць будзе яшчэ і падсвечана. Магчыма, рознымі колерамі. За два тыдні работа амаль зроблена. Будаўнікам засталося толькі правесці падсвечванне і скончыць утрамбоўку пліткі.
Плітка звычайная, тратуарная, з пігментам і зносаўстойлівая. Падсвечванне накрые спецыяльнае трывалае шкло, бо па карце будзе падарожнічаць не адна пара ног. Вось ужо, сапраўды, адна нага ў Брэсце — другая ў Гродна. Арганізацыя, якая выйграла тэндар, рабіла і дызайн карты. Яе контуры выкананы не ў дэталёвай дакладнасці — пліткай «фігуру» нашай краіны не паўтарыць. Дызайнеры з улікам асаблівасцей будматэрыялу прыўнеслі ў праект мастацкія дапушчэнні. Колер абласцей таксама не такі, як мы можам бачыць на картах, адценні вытанчаныя. Віцебская вобласць кававага колеру, Магілёўская — малочнага, Гомельская — колеру чарназем'я, Брэсцкая — пясочнага, Гродзенская — бардовага, а Мінская — памяранцавага.
