У аддзеле інфармацыі і сувязей з грамадскасцю Белдзяржфілармоніі так апісваюць сюжэт праграмы: «Сустрэліся аднойчы Альт з Віяланчэллю. Звычайна вясёлыя і бесклапотныя, яны па звычцы настроіліся, зверылі ў актаву струны — ля, рэ, соль і самую нізкую до — і зайгралі музыку... трохі сумную. Не змаўляючыся, яны паглядзелі адзін на аднаго праз акуляры і зразумелі, чаго ім не хапала. Ім не хапала тоненькага «мімішнага» галаску струны «мі», які мог быць толькі ў скрыпачкі. І вельмі хутка ў гэтай сям’і з’явіўся маленькі, вельмі падобны на іх інструмент». Ніхто і падумаць не мог, што праз некалькі стагоддзяў гэты інструмент стане сапраўднай каралевай музыкі. А дапамогуць яму ў гэтым розныя выдатныя музыканты — Антоніа Вівальдзі, Джузэпэ Тарціні, Вольфганг Амадэй Моцарт, Мікола Паганіні. Іх музыка і будзе гучаць у заўтрашнім канцэрце.
Фота philharmonic.by