У кожным рэгіёне — свае адметнасці. Многія з іх сёлета можна ўбачыць у гарадах і мястэчках 25 і 26 лютага. Пра гэта ў час круглага стала на тэму «Традыцыі аб'ядноўваюць» у прэс-цэнтры Дома прэсы расказалі кіраўнікі ўстаноў культуры Мінска і рэгіёнаў.
Спікеры паведамілі: святкаванне Масленіцы ахопіць усе без выключэння раённыя цэнтры краіны. Асноўным цэнтрам гулянняў стане культурная сталіца Беларусі 2023 года — горад Слуцк.
Бераставіцкі раён запрашае на конкурс прыпевак, масленічны флэшмоб. У Гродзенскім раёне аматараў танцаў чакае этна-марафон «Тапатуха-Весялуха», а таксама майстар-клас па выпечцы бліноў на калодцы. У Дзятлаўскім раёне пройдзе «Парад санак — 2023». Упершыню ў Карэліцкім раёне адбудзецца конкурс на лепшае афармленне гужавых павозак сярод прадпрыемстваў і арганізацый раёна, адбудзецца кулінарнае спаборніцтва «Блінная фантазія».
Намеснік начальніка ўпраўлення культуры Гродзенскага абласнога выканаўчага камітэта Сняжана Каратчык расказала: у Карэлічах на Масленіцу будзе працаваць інтэрактыўная пляцоўка з печкай пад назвай «Цуд», з якой госці свята сваімі рукамі змогуць дастаць прыз. Ашмянскі раён правядзе забег з блінамі. Прыняць удзел у свяце можа любы жадаючы, дастаткова прыйсці на Масленіцу з фартухом і патэльняй. У Смаргоні адбудзецца конкурс шпакоўняў, у Шчучынскім раёне аматараў бліноў і аладак запрашаюць на вялікі карагод.
У вёсцы Даўгаполле Гарадокскага раёна Віцебскай вобласці на Масленічным тыдні ў панядзелак адбыўся абрад «Пахаванне Дзеда», характэрны толькі для гэтага рэгіёна. Дзейства працягнецца ў нядзелю, калі па трыдыцыі патрэбна праводзіць «Пахаванне Бабы». І Дзеда, і Бабу, зробленых з саломы і старога адзення, жанчыны сталага ўзросту аплакваюць, потым нясуць на вуліцу. Гэты звычай мае шмат агульнага з традыцыйным спальваннем пудзіла Масленіцы, калі людзі імкнуліся пазбавіцца ад суроку, хваробаў, грахоў.
Калі хочацца акунуцца ў атмасферу народных гулянняў на Гомельшчыне, то 26 лютага можна зазірнуць у аграгарадок Тонеж Лельчыцкага раёна, дзе будзе прадэманстраваны знакаміты абрад «Чырачка». Арганізатары абяцаюць песні, скокі і, вядома, духмянае печыва ў выглядзе птушак «Чырачкі». Цікава, што ў гэтай мясцовасці абавязковы атрыбут сустрэчы вясны — упрыгожванне ялінкі. З даўніх часоў нашы продкі атаясамлівалі прыход цяпла і пачатак сельскагаспадарчых работ з новым годам.
У Лельчыцкім раёне на Масленіцу можна прыняць удзел у народнай забаве скатвання з горак. Калі снега будзе мала, арганізатыры абяцаюць пасцяліць для гасцей дываны.
Абавязковы атрыбут масленічных забаў беларусаў — багатыя сталы з блінамі, аладкамі і іншымі ласункамі. Асаблівасць провадаў зімы ў Бярозаўскім раёне — пачастункі ў выглядзе галушак, што па традыцыі падаваліся на стол абавязкова з цукрам.
Прыязджайце усёй сям'ёй! Будзе цікава!
kuzmich@sb.by