Беларусы з даўніх часоў любілі і шанавалі мёд. Спачатку займаліся дзікім пчалярствам — знаходзілі пчаліныя гнёзды ў дуплах дрэў і збіралі мёд. Пазней з’явіліся свядомыя бортнікі, якія выкарыстоўвалі спецыяльныя борці і вуллі. Мёд і прадукты пчалярства актыўна ўжываліся насельніцтвам, а таксама адпраўляліся на экспарт.
Прасачыць гісторыю развіцця пчалярства ў Беларусі, дакрануцца да таямнічага свету пчол, паспрабаваць мёд з розных раслін хутка можна будзе ў Музеі мёду на тэрыторыі Бярэзінскага біясфернага запаведніка. Яго адкрыццё запланавана на наступную пятніцу, 14 жніўня, — у гэты дзень якраз адзначаецца Мядовы Спас.
Будаўнічыя абавязкі ўзялі на сябе супрацоўнікі запаведніка, а вось афармленнем музея займаецца каманда сялянскай фермерскай гаспадаркі «Мядовая сям’я». Экспанаты збіралі з розных куткоў краіны. Сярод іх як абсталяванне старой канструкцыі (борці, лежакі і іншыя), так і самыя сучасныя вуллі, якія выкарыстоўваюцца на большасці прамысловых пчальнікоў. У музеі будуць выстаўлены таксама пасечны інвентар, гербарыі і насенне меданосаў, розныя гатункі мёду. Дарэчы, усіх наведвальнікаў новага турыстычнага аб’екта, паведамляе berezinsky.by, чакае чаяпіцце з дэгустацыяй салодкага золата.
Кіраўніцтва Бярэзінскага біясфернага запаведніка ўпэўнена, што Музей мёду будзе спрыяць экалагічнаму выхаванню грамадзян розных узростаў, далучаючы іх да пчалярства і спажывання гэтага карыснага прадукту.
mila@sb.by