Лепшыя ролi Мiкалая Рыбнiкава.
Хлопец з Зарэчнай вулiцы
У наступную нядзелю, 4 лiпеня, у эфiры АНТ прэм’ера — фiльм пра акцёра Мiкалая Рыбнiкава. Ён стварыў у кiнематографе вобраз працоўнага хлопца, якi стаў прыкладам для ўсёй краiны. Хлапчукi тых гадоў пiсалi лiсты сталявару Аляксандру Саўчанку i мантажнiку-вышыннiку Мiкалаю Пасечнiку i жадалi ва ўсiм быць падобнымi на сваiх кумiраў. А дзяўчаты прызнавалiся ў каханнi прыгажуну-лесарубу Iльi Каўрыгiну. Усе гэтыя лiсты ад захопленых прыхiльнiкаў паштальёны ўручалi аднаму чалавеку — акцёру Мiкалаю Рыбнiкаву. «Вясна на Зарэчнай вулiцы», «Вышыня», «Дзяўчаты» — гэтыя i iншыя фiльмы з яго ўдзелам дагэтуль пераглядае не адно пакаленне гледачоў. Раскажуць аўтары дакументальнай стужкi «Хлопец з Зарэчнай вулiцы» i пра самую вялiкую любоў Мiкалая Рыбнiкава. У акцёра былi закаханы ўсе дзяўчаты Савецкага Саюза, але ён усё жыццё горача любiў толькi адну жанчыну — першую прыгажуню айчыннага кiно Алу Ларыёнаву.У карцiне, якая пачнецца на АНТ у 12:30, сваiмi ўспамiнамi з гледачамi падзеляцца актрыса Iна Макарава, рэжысёр Святлана Дружынiна, акцёры Алег Меншыкаў, Сяргей Бязрукаў, Сяргей Нiканенка i многiя iншыя.
Краiна герояў
У наступныя выхадныя тэлеканал «Беларусь 3» пакажа ў эфiры два фiльмы з гiсторыка-бiяграфiчнага цыкла «100 iмёнаў Беларусi». У Дзень Незалежнасцi ў 18:05 гледачоў чакае новая праца рэжысёра Аляксея Раковiча «Генерал Корж», прысвечаная жыццю героя Вялiкай Айчыннай вайны Васiля Каржа....Пачатак 1960-х гадоў. Малады пiсьменнiк адпраўляецца ў палескую глыбiнку — калгас з невыпадковай назвай «Партызанскi край», каб дапамагчы яго старшынi трохi «падправiць» свае мемуары. Аднак пiсьменнiк адразу разумее, што задача гэта няпростая. Герой вайны генерал Васiль Корж — чалавек рашучы i прынцыповы, i парадныя партрэты яго не цiкавяць…
Праз дзень трэцяя кнопка прадставiць аўдыторыi яшчэ адну навiнку — на гэта раз ад рэжысёра Уладзiмiра Луцкога. Яго дакументальны фiльм «Вiтольд Цераскi. De rebus omnibus» быў завершаны ў гэтым годзе, i на тэлеэкране яго пакажуць упершыню. Стужка прысвечана знакамiтаму астрафiзiку XIX стагоддзя, нашаму таленавiтаму земляку, выпускнiку слуцкай гiмназii № 1 Вiтольду Цераскаму.
Доктар астраномii, член-карэспандэнт Пецярбургскай акадэмii навук, член Маскоўскага матэматычнага таварыства, дырэктар абсерваторыi i прафесар кафедры астраномii Маскоўскага дзяржаўнага ўнiверсiтэта iмя М. В. Ламаносава Вiтольд Цераскi сёння практычна забыты, хаця для свайго часу ён быў героем i здзяйсняў сусветныя адкрыццi. Так, менавiта Цераскi, якi лiчыцца адным з пiянераў прымянення фатаграфii ў астраномii, пабудаваў першы фотаметр, дзякуючы якому змог вызначаць зорныя велiчынi.
leonovich@sb.by