На сёння 228 суб’ектаў гаспадарання ўжо атрымалі дазвол на ўсталяванне летніх кафэ.На свежым паветры — смачней
З канца сакавіка ля некаторых сталічных кафэ, бараў і рэстаранаў сталі працаваць адкрытыя пляцоўкі — упадабаныя ўсімі тэрасы. У сталіцы, дарэчы, працуе каля 3300 аб’ектаў грамадскага харчавання на 175 100 месцаў: 172 рэстараны, 107 рэстаранаў хуткага абслугоўвання, 634 кафэ, 495 міні-кафэ, 410 бараў і 119 закусачных.— На сёння 228 суб’ектаў гаспадарання ўжо атрымалі дазвол на ўсталяванне летніх кафэ, з іх 135 пачнуць працаваць у парках і на пляжах Савецкага раёна. Актыўная падача дакументаў на арганізацыю такога віду гандлю працягваецца. Напрыклад, больш за 30 заявак цяпер на разглядзе. Таксама з пачатку сакавіка ў горадзе працуе 131 пляцоўка для продажу гародніны і садавіны. Перш за ўсё, новыя пункты з’явіліся ў буйных спальных мікрараёнах, — падзялілася лічбамі начальнік Галоўнага ўпраўлення гандлю і паслуг Мінгарвыканкама Ніна Емяльянава. — Пры арганізацыі і размяшчэнні нестацыянарных гандлёвых аб’ектаў і аб’ектаў грамадскага харчавання суб’екты гандлю павінны выконваць правілы. Яны адлюстраваны ў «Рэкамендацыях па арганізацыі і размяшчэнні перасоўных сродкаў развазнога і разнаснога гандлю, нестацыянарных аб’ектаў грамадскага харчавання, летніх пляцовак...» і ўзгоднены МАРГ, Мінкультуры і Мінбудархітэктуры.
Тэрміны адкрыцця і закрыцця аб’ектаў вынаснога гандлю не маюць пэўных рэкамендацый. Тут галоўны «начальнік» — надвор’е. Напрыклад, на тэрыторыі Мінска некаторыя летнія пляцоўкі распачалі працу з 25 сакавіка. Звычайна сезон працягваецца да лістапада.
Летнія веранды дазваляюць рэстаратарам прывабіць дадатковую колькасць кліентаў, забяспечыць ім камфортнае баўленне часу на паветры.— Летнія веранды дазваляюць рэстаратарам прывабіць дадатковую колькасць кліентаў, забяспечваюць ім камфортнае баўленне часу на паветры. Гэта сучасныя аб’екты ад магазінаў, рэстаранаў, кафэ і бараў, — пералічвае Ніна Емяльянава. — Гандлёвае абслугоўванне арганізуюць на цэнтральных магістралях, у турыстычных зонах, у парках, скверах, паблізу вадаёмаў і на іншых тэрыторыях. Наведвальнікам прапануюць шырокі асартымент кандытарскіх і кулінарных вырабаў, марожанага, квасу, піва, разнастайных прахаладжальных напояў.
Аб’екты вынаснога гандлю ўстаноўлены з выкарыстаннем зборна-разборных канструкцый, парасонаў, дэкаратыўных празрыстых агародж, насцілаў, асвятляльных і абагравальных прыбораў, вертыкальнага азелянення і кветачніц.
Сняданак у парку
Парк Паўлава, недалёка ад станцыі метро Пятроўшчына. Тут пейзаж працоўнай раніцы складаюць лясныя матывы, шпацыруюць мамы з дзецьмі. Дыхаюць свежым паветрам і пенсіянеры. Некаторыя — з унукамі. Хлапчукі на роліках ганяюць туды-сюды, раз-пораз пазіраючы на вабныя вітрыны летняга міні-кафэ.— Ба, а давай па марожаным! — просіць унук, і бабуля купляе два халодныя сметанковыя дэсерты. Яны ўладкоўваюцца на лавачцы і з задавальненнем ядуць ласунак, што растае.
Падыходзіць і мама з каляскай:
— Садавіннае пюрэ, калі ласка, — дзяўчына выбірае прыдатны прыкорм для маленькай дачкі і дадае: — Вы наша палачка-ратавалачка. З каляскай у магазін ісці не хочацца.
За тры гады працы прадавец Лілія Іванова ведае амаль усіх сваіх пакупнікоў. У іх сфарміраваўся і стандартны набор прадуктаў.Шмат у чым выручка летніх міні-кафэ залежыць ад надвор’я. Мінімальная — у дождж, максімальная — у выхадны пагодлівы дзень. Настрой нябеснай канцылярыі дыктуе і графік працы. Але ў асноўным міні-кафэ працуюць з 10:00 да 21:00. За тры гады працы прадавец Лілія Іванова ведае амаль усіх сваіх пакупнікоў. У іх сфарміраваўся і стандартны набор прадуктаў.
— Хіт продажаў — хот-догі. Яны ў пашане як у дарослых, так і ў дзяцей. Дзеці любяць і ультрасалодкія венскія вафлі. Просяць дадаткова паліць шакаладам, — дзеліцца густавымі прыхільнасцямі наведвальнікаў Лілія Іванова.
Дарэчы, каштуе салодкае задавальненне 3,2 рубля. Працягваюць пералік салодкай выпечкі пончыкі па два рублі і слойкі з разнастайнымі начынкамі, пачынаючы ад вяндліны з сырам да шпінату і сыру рыкота. Хіт продажаў — французскі хот-дог — рэалізуюць па 4,3 рубля.
Хіт продажаў — французскі хот-дог.— Даволі вялікі працэнт нашых пакупнікоў — мамы з дзецьмі. Часта заходзяць і пенсіянеры. Сума па чэку выходзіць рознай. Калі горача, могуць купіць толькі марожанае (гэта менш за два рублі). А бывае, што сям’я пакіне ў касе і больш за 20 рублёў. Але ў сярэднім трацяць па пяць — сем рублёў, — падлічвае ўладальнік міні-кафэ Арцём Папейка.
Яго кафэ працуе трэці год. За гэты час некалькі разоў карэкціравалі асартымент. Асноўны арыенцір — жаданні кліентаў. Напрыклад, у гэтым сезоне ў меню з’явіліся блінцы ўласнага прыгатавання і садавінныя пюрэ ва ўпакоўках. Іх зручна даваць маленькім дзецям. Цана на блінец залежыць ад начынкі. Напрыклад, за «Паўлаўскі» з сырам, вяндлінай, ананасам і гарчычным соусам — 5,8 рубля. Не забываюць і пра такія хіты вынаснога гандлю, як вараная кукуруза, папкорн, кава, чай, прахаладжальныя напоі. За пачатак кукурузы вагой 250 грамаў — чатыры рублі. Кава — ад 2,4 да 4,5 рубля. Вабяць водарам і натуральныя чаі: абляпіхавы, цытрусава-імбірны і журавінавы з імбірам. Такое задавальненне абыдзецца ў 3,5 рубля.
Пра антыкавідныя меры на пляцоўках таксама не забываюць: прадаўцы тут у пальчатках і масках. Іх рэкамендуецца мяняць раз у дзве гадзіны. Ёсць антысептычныя і антыбактэрыяльныя сродкі для апрацоўкі рук. Яны могуць размяшчацца не на кожным століку, а ля ўвахода ва ўстанову. Столікі дэзынфіцыруюць і расстаўляюць на адлегласці 1,5 метра адзін ад аднаго. Словам, уладальнікі летніх пляцовак імкнуцца стварыць усе ўмовы, каб адпачываць у іх было бяспечна і прыемна. Бо ад гэтага залежыць, ці прыйдзе кліент зноў.
tychko@sb.by
